ഏഴുവര്‍ഷമായി ന്യുയോര്‍ക്ക് നഗരവുമായി തുടരുന്ന വസ്തുതര്‍ക്കക്കേസില്‍ ഇന്ത്യന്‍ സര്‍ക്കാരിന് വിജയം. നയതന്ത്ര പ്രതിനിധികള്‍ക്കായുള്ള വീടുകള്‍ സ്വന്തമായുള്ള രാജ്യങ്ങള്‍ വസ്തു നികുതി നല്‍കേണ്ടതില്ലെന്ന് യു.എസ് ഫെഡറല്‍ കോടതിയുടെ വിധിയോടെയാണ് ഇന്ത്യ വിജയം കണ്ടെത്. ഇതോടെ, മുന്‍കാല നികുതികളും പലിശയും അടക്കം 4.25 കോടി ഡോളര്‍ അടക്കുന്നതില്‍ നിന്നാണ് ഇന്ത്യ രക്ഷപ്പെട്ടത്. ഇന്ത്യക്ക് പുറമെ മംഗോളിയയെയും നികുതി അടക്കുന്നതില്‍ നിന്ന് കോടതി ഒഴിവാക്കി. 43 ലക്ഷം ഡോളറാണ് മംഗോളിയ അടക്കേണ്ടിയിരുന്നത്. നയതന്ത്ര പ്രതിനിധികള്‍ക്കായുള്ള വീടുകള്‍ക്ക് പ്രതിവര്‍ഷം 70 ലക്ഷം ഡോളര്‍ വസ്തു നികുതിയാണ് ന്യൂയോര്‍ക് നഗരസഭ ചുമത്തിയത്.

വടക്കന്‍ ഫീനിക്‌സില്‍ സ്ഥാപിച്ചിരുന്ന ബ്ലൂമെയില്‍ കളക്ഷന്‍ ബോക്‌സ് മോഷണം പോയി. കണ്ടെത്താന്‍ സഹായിക്കുന്നവര്‍ക്ക് 10,000 ഡോളര്‍ വരെ സഹായം നല്‍കുമെന്ന് യു എസ് പോസ്റ്റല്‍ ഇന്‍സ്‌പെക്ഷന്‍ സര്‍വ്വീസ് പ്രഖ്യാപിച്ചിരിക്കുകയാണ്. തിങ്കളാഴ്ചയോ ചൊവ്വാഴ്ച പുലര്‍ച്ചെയോ ആണ് തപാല്‍പെട്ടി മോഷ്ടിക്കപ്പെട്ടത്.

രണ്ടാഴ്ചക്കാലം ലൈബ്രറി വരാന്തയില്‍ ഊണും ഉറക്കവുമായി കഴിച്ചുകൂട്ടിയ യുവാവ് പിടിയില്‍. ന്യൂജഴ്‌സിയിലെ ഓഷ്യന്‍ ടൗണ്‍ഷിപ്പ് ലൈബ്രറി ബേസ്‌മെന്റിലാണ് ചാള്‍സ് ജോണ്‍സ് ജൂണിയര്‍ എന്നയാള്‍ രണ്ടാഴ്ചയോളം അനധികൃതമായി താമസിച്ചത്. 26 കാരനായ ചാള്‍സിന് സ്വന്തമായി വീടില്ലായിരുന്നുവെന്ന് പോലീസ് കണ്ടെത്തി. ബേസ്‌മെന്റിലെ വാതില്‍ തുറന്നാണ് ചാള്‍സ് അകത്ത് കടന്നിരുന്നത്.

യു എസിലെ ഫ്‌ളോറിഡയില്‍ മ്യൂസിയത്തില്‍ നിന്നും അഞ്ചരലക്ഷത്തോളം ഡോളര്‍ വിലമതിക്കുന്ന സ്വര്‍ണകട്ടി മോഷണം പോയ സംഭവത്തില്‍ അന്വേഷണം പുരോഗമിക്കുന്നു. 17-ാം നൂറ്റാണ്ടില്‍ അപകടത്തില്‍പ്പെട്ട സ്പാനിഷ് കപ്പലിന്റെ അവശിഷ്ടങ്ങളില്‍നിന്ന് 1980 ല്‍ മെല്‍ഫിഷര്‍ എന്ന അമേരിക്കന്‍ നിധി വേട്ടക്കാരന്‍ കണ്‌ടെത്തിയ 74.85 ഔണ്‍സ് ഭാരമുള്ള സ്വര്‍ണക്കട്ടിയാണ് മോഷണം പോയത്. 28 സെന്റീമീറ്റര്‍ നീളമുള്ള സ്വര്‍ണക്കട്ടി ഫ്‌ളോറിഡയിലെ മെല്‍ഫിഷര്‍ മാരിടൈം മ്യൂസിയത്തിലായിരുന്നു സൂക്ഷിച്ചിരുന്നത്. 

ഹാരി മുതലയുടെ പ്രവചനങ്ങള്‍ തുടരുന്നു. ഓസ്‌ട്രേലിയന്‍ തെരഞ്ഞെടുപ്പില്‍ ഇത്തവണ ജൂലിയ ഗില്ലാര്‍ഡ് വിജയിക്കുമെന്നാണ് മുതല വലിയ വായില്‍ വിളിച്ചുപറഞ്ഞിരിക്കുന്നത്. സ്‌പെയിന്‍ ലോകകപ്പ് നേടുമെന്ന് പ്രവചിച്ച ഹാരി പറയുന്നത് ഇപ്പോഴത്തെ പ്രധാനമന്ത്രി ജൂലിയ ഗില്ലാര്‍ഡ് സ്ഥാനം നിലനിര്‍ത്തുമെന്നാണ് പറയുന്നത്. ഡാര്‍വിനിലെ ക്രോക്കോറസ് കോവ് തീം പാര്‍ക്കിലെ അന്തേവാസിയാണ് 700 കിലോഗ്രാം ഭാരമുള്ള ഹാരി. ജൂലിയ ഗില്ലാര്‍ഡിന്റെയും എതിരാളി ടോണി അബോട്ടിന്റെയും ചിത്രങ്ങള്‍ക്കൊപ്പം കോഴിയിറച്ചി തൂക്കിയിട്ടാണ് ഹാരിയെ കൊണ്ട് പ്രവചനം നടത്തിച്ചത്.