ഒരു ബ്ലാക്ക്‌ ആന്‍ഡ്‌ വൈറ്റ് “കേരളം”

Thursday, 05 November 2009 18:18

എല്ലാവര്ക്കും എന്റെ ഹാര്‍ദ്ദവമായ കേരളപ്പിറവി ദിനാശംസകള്‍… ഈ പിറന്നാള്‍ വേളയില്‍ എന്റെ മനസ്സില്‍ വന്ന കേരളത്തിന്റെ ഒരു ബ്ലാക്ക്‌ ആന്‍ഡ്‌ വൈറ്റ് ചിത്രം ഞാന്‍ ഇവിടെ എഴുതുന്നു.

പ്രകൃതി‌ കനിഞ്ഞനുഗ്രഹിച്ച, ലോക സഞ്ചാരികളെ ആകര്‍ഷിക്കുന്ന മനോഹാരിത. നല്ല കാലാവസ്ഥ. നെല്ലും വാഴയും ഏലവും കുരുമുളകും തേയിലയും നാളികേരവും വിളയുന്ന തോട്ടങ്ങള്‍.	മാലിന്യം നിറഞ്ഞ വഴിയോരങ്ങള്‍. കുണ്ടും കുഴിയും നിറഞ്ഞ, ഒരു മഴ പെയ്താല്‍ കുളങ്ങളായി മാറുന്ന റോഡുകള്‍.
പ്രതിഭാധനരായ വിദ്യാഭ്യാസ… രാഷ്ട്രീയ… കലാ… സാംസ്കാരിക നായകര്‍. കേരളത്തെ മാത്രമല്ല ഇന്ത്യയെ വരെ നയിക്കാന്‍ അറിവും ശക്തിയുമുള്ള നേതാക്കള്‍.	എന്ത് നല്ല കാര്യം നടപ്പിലാക്കാന്‍ ശ്രമിച്ചാലും അതിനെ നഖശിഖാന്തം എതിര്‍ക്കുന്ന, സ്വന്തം കാര്യങ്ങള്‍ക്ക് മാത്രം മുന്‍തൂക്കം നല്‍കുന്ന രാഷ്ട്രീയ നേതാക്കള്‍. ആവശ്യത്തിനും അനാവശ്യത്തിനും ഹര്‍ത്താലും, ബന്ദും, മറ്റു പണിമുടക്കും നടത്തി അക്രമം അഴിച്ചു വിട്ടു ജനജീവിതം ബുദ്ധിമുട്ടിലാക്കുന്ന രാഷ്ട്രീയപാര്‍ട്ടികള്‍.
എന്തെങ്കിലും അപകടമോ ആവശ്യങ്ങളോ വന്നാല്‍ സഹായ ഹസ്തവുമായി ഓടിയെത്തുന്ന അയല്‍ക്കാര്‍, നാട്ടുകാര്‍, രാഷ്ട്രീയം നോക്കാതെ സഹായിക്കുന്ന രാഷ്ട്രീയ പ്രവര്‍ത്തകര്‍	ഒരു നിവൃത്തിയുമില്ലാതെ ബസ്‌ സ്ടാണ്ടിലും നഗര വീധികളിലും ഭിക്ഷ യാചിച്ചു നടക്കുന്നവര്‍. വെള്ളത്തിന്‌ വേണ്ടി അലഞ്ഞു നടക്കുന്ന ഗ്രാമവാസികള്‍.
ലോകത്തിന്റെ ഏതു കോണിലും കാണുന്ന മലയാളി സാന്നിധ്യം. ഏതു രാജ്യത്തും ഏതു ജോലിയും വളരെ ഭംഗിയായി ചെയ്യുന്ന സ്വന്തം വ്യക്തിത്വം തെളിയിച്ച മലയാളികള്‍.	ചുവപ്പ് നാടകള്‍ നിറഞ്ഞ സര്‍ക്കാര്‍ ആപ്പീസുകളും അഴിമതിയ്ക്ക് വളം വയ്ക്കുന്ന കുറെ ഉദ്യോകസ്തരും.
കേരളത്തിന്‌ അകത്തും പുറത്തും വ്യവസായ സംരംഭങ്ങള്‍ നടത്തി വ്യക്തിമുദ്ര പതിപ്പിച്ച കേരളീയര്‍.	വ്യവസായ വികസനത്തിന്‌ എതിരെ നില്‍ക്കുന്ന രാഷ്ട്രീയ പ്രവര്‍ത്തനങ്ങളും ചുവപ്പ് നാടകളും.
സമ്പൂര്‍ണ്ണ സാക്ഷര നേടിയ കേരള ജനത.	എടുത്താല്‍ പൊങ്ങാത്ത ബാഗും മനസ്സിന് താങ്ങാന്‍ കഴിയുന്നതില്‍ അപ്പുറവുമായ സിലബസ്‌ പഠിക്കുന്ന പിഞ്ചു കുട്ടികള്‍…
ടി വി സിനിമ തുടങ്ങിയ മാധ്യമങ്ങള്‍ക്ക് കൂടുതല്‍ പ്രാധാന്യം നല്‍കുകയും അതിലെ പുതിയ സാങ്കേതിക വിദ്യകള്‍ കൊണ്ട് വരാന്‍ ശ്രമിക്കുകയും ചെയ്യുന്ന പുതു തലമുറ.	മലയാള ഭാഷയോട് വിമുഖത കാട്ടുന്ന, എഴുത്തും വായനയ്ക്കും പ്രാധാന്യം നല്‍കാത്ത പുതു തലമുറ.
മത സൌഹാര്‍ദം ഉള്ളില്‍ കെടാതെ കാത്തു സൂക്ഷിക്കുന്ന വിശ്വാസികള്‍. ഏതു മതത്തിന്റെ ആഘോഷവും സ്വന്തം ആഘോഷമായി കാണുന്ന കേരളീയര്‍.	ഇപ്പോഴും പിന്തുടരുന്ന ചില അന്ധവിശ്വാസങ്ങളും മതത്തെ പരസ്പരം പോരാടിപ്പിക്കാന്‍ ഉപയോഗിക്കുന്നവരും.