ന്യൂയോര്‍ക്ക്: ഇന്ത്യയ്‌ക്കെതിരേ ഇപ്പോഴും ഭീകരസംഘടനയായ അല്‍ക്വയിദയുടെ ഭീഷണിയുണ്ടെന്ന് അമേരിക്കന്‍ രഹസ്യാന്വേഷണസംഘടനയായ സിഐഎ വെളിപ്പെടുത്തി. പാകിസ്ഥാനിലും അഫ്ഗാനിസ്ഥാനിലും അല്‍ക്വയിദ കടുത്ത സമ്മര്‍ദ്ദം നേരിടുന്നുണ്ടെങ്കിലും ഇന്ത്യയും ബ്രസീലും ഇവരുടെ ആക്രമണലക്ഷ്യങ്ങളാണെന്ന് സിഐഎ തലവന്‍ ലിയോണ്‍ പനേറ്റ കഴിഞ്ഞ ദിവസം പറഞ്ഞു.ആക്രമണ പദ്ധതികളെ കുറിച്ച് മുന്‍കൂട്ടി വിവരം നല്‍കുന്നത് യുഎസ് ചാര സംഘടനയുടെ കര്‍ത്തവ്യമാണ്.

അഫ്ഗാനിലും പാകിസ്ഥാനിലും നടക്കുന്ന സൈനിക നടപടികള്‍ കാരണം താലിബാന്‍, അല്‍ക്വയ്ദ നേതൃത്വം സ്വയരക്ഷയ്ക്കായുള്ള ശ്രമത്തിലാണ്.അമേരിക്ക അല്‍ക്വയ്ദയുമായി യുദ്ധം പ്രഖ്യാപിച്ചിരിക്കുകയാണ്. സംഘടനയുടെ 20 മുന്‍നിര കമാന്‍ഡര്‍മാരില്‍ പകുതിയോളം പേരെ ഇല്ലാതാക്കാന്‍ ഇതിനകം കഴിഞ്ഞിട്ടുണ്ട്. അഫ്ഗാനിസ്ഥാനിലെ ഡ്രോണ്‍ ആക്രമണങ്ങളിലൂടെ കഴിഞ്ഞ മൂന്ന് വര്‍ഷം കൊണ്ട് 600 ഓളം ഭീകരരെ വധിക്കാന്‍ കഴിഞ്ഞതായും പനേറ്റ അവകാശപ്പെട്ടു. എന്നാല്‍ ഭീകരര്‍ വിനാശകരമായ ആയുധങ്ങള്‍ സ്വന്തമാക്കുന്നത് തടയേണ്ടിയിരിക്കുന്നു. ആണവായുധങ്ങള്‍ സ്വന്തമാക്കുന്നത് മതപരമായ കടമയാണെന്നാണ് ഒസാമ ബിന്‍ ലാദന്‍ ആഹ്വാനം ചെയ്തിട്ടുള്ളത്. അടുത്ത പേള്‍ഹാര്‍ബര്‍ ഒരു സൈബര്‍ ആക്രമണമായിരിക്കുമെന്ന്  ഭയമുണ്ടെന്നും സിഐഎ തലവന്‍ വ്യക്തമാക്കി

By Malayalam Report News Bureau